Временските услови и загадувањето на воздухот. Како да се заштитите од загадениот воздух?

Временските услови и квалитетот на воздухот се до одреден степен поврзани. Примарниот извор на загадувачи во воздухот е човековата активност, но временските услови во голема мера одредуваат што се случува со честичките од загадувањето кога ќе стигнат до воздухот.

Прво ќе ги наведеме временските услови кои придонесуваат за подобрување на квалитетот на воздухот. Ветерот го меша воздухот и во хоризонтална и во вертикална насока, носејќи ги загадувачите подалеку од изворот на загадување, додека врнежите ги исфрлаат загадувачите од воздухот на земјата и другите површини. Во сончеви услови, кога нема температурна инверзија (зголемување на температурата на воздухот со висина), има и мешање на приземните слоеви на воздухот.

Кога е тивко, без значителен ветер или облачно со магла/ниска облачност, загадувачите се акумулираат во областа на изворот на загадување, бидејќи нема мешање на воздушните слоеви и нема транспорт на загадувачи од изворот на загадување. Доколку таквата временска ситуација трае со часови или денови, може да се достигнат критичните прагови на загадувачи во воздухот.

Ситуациите со висока загаденост на воздухот се почести во студената половина, како поради неповолните временски услови, така и поради човековата активност. Воздухот е особено загаден во урбаните и индустриските средини и областите со густ сообраќај.

Кога квалитетот на воздухот е лош, односно кога загаденоста на воздухот е зголемена или достигнува нивоа опасни по здравјето, се препорачуваат одредени мерки за намалување на влијанието на аерозагадувањето врз здравјето.

Во деновите со висока загаденост треба да избегнувате активности на отворено - спорт и рекреација, бидејќи опасните загадувачи влегуваат во белите дробови со вдишување воздух, не ги проветрувајте просториите додека не се намали загадувањето на воздухот, чувствителните групи на население - новороденчиња, деца, трудници , хронично болните и постарите лица, треба да избегнуваат да бидат на отворено.

Изложеноста на загаден воздух не е препорачлива за ниту една категорија на население. Доколку е потребно подолго време да се поминува на отворено со зголемено загадување, а за чувствителните групи и за пократок престој, може да се користат наменски заштитни маски кои го покриваат носот и устата, кои го намалуваат вдишувањето на загадувачите.